Job 26 WLC 1ויען איוב ויאמר׃ 2מה־עזרת ללא־כח הושעת זרוע לא־עז׃ 3מה־יעצת ללא חכמה ותושיה לרב הודעת׃ 4את־מי הגדת מלין ונשמת־מי יצאה ממך׃ 5הרפאים יחוללו מתחת מים ושכניהם׃ 6ערום שאול נגדו ואין כסות לאבדון׃ 7נטה צפון על־תהו תלה ארץ על־בלי־מה׃ 8צרר־מים בעביו ולא־נבקע ענן תחתם׃ 9מאחז פני־כסה פרשז עליו עננו׃ 10חק־חג על־פני־מים עד־תכלית אור עם־חשך׃ 11עמודי שמים ירופפו ויתמהו מגערתו׃ 12בכחו רגע הים [ובתובנתו כ] (ובתבונתו ק) מחץ רהב׃ 13ברוחו שמים שפרה חללה ידו נחש בריח׃ 14הן־אלה ׀ קצות [דרכו כ] (דרכיו ק) ומה־שמץ דבר נשמע־בו ורעם [גבורתו כ] (גבורותיו ק) מי יתבונן׃ ס Hebrew OT: WLC (Consonants Only) For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. Bible Hub |
    |